Problem nədədir?

Müəllim su ilə dolu bir stəkanı şagirdlərinə göstərərək soruşdu:

– Uşaqlar, sizcə bu stəkanın çəkisi nə qədərdir?

– Təxminən iki yüz qram, – deyə şagirdlər cavab verdilər.

– Gördüyünüz kimi, çəkisi elə də ağır deyil, – müəllim dedi və yenə soruşdu. – Bəs bu stəkanı bir neçə dəqiqə əlimdə saxlasam, nə olar?

– Yəqin ki, heç nə olmaz.

– Yaxşı. Bəs bir saat belə saxlasam?

– Əliniz yorular.

– Bəs bir neçə saat davam etsəm?

– Əliniz ağrımağa başlayar.

– Doğrudur. Bəs bu vəziyyətdə stəkanı bir gün əlimdə tutsam?

– Saxlaya bilməzsiniz! Ya da ki, əliniz keyiyər, hətta iflic ola bilər, – deyə şagirdlərdən biri üzündə narahat ifadə ilə cavab verdi.

– Çox gözəl, – müəllim sözünə davam etdi. – Bəs stəkanın çəkisi dəyişdimi?

– Xeyr, – cavab gəldi.

– O zaman bu ağrı haradan yarandı?

– Uzunmüddətli gərginlikdən, – deyə şagirdlər cavab verdilər.

– Bu ağrıdan qurtulmaq üçün nə etməliyəm?

– Stəkanı yerə qoymalısınız, – deyə uşaqlar dilləndilər.

– Həyatdakı problemlər də əslində belədir, – müəllim dedi. – Onları bir neçə dəqiqə düşünmək normaldır və zərərsizdir. Ancaq, bir neçə saat beyninizdə çək-çevir etsəniz, başınız şişər. Günlərlə bu fikirlərlə yaşasanız, sizi iflic edər, başqa heç nə ilə məşğul ola bilməzsiniz. Bu ağrını azaltmağın yolu isə problemi beyninizdə çox tutmamaqdır.

© 2025 · coaching.az